Զլատան Իբրահիմովիչ

«Բարսելոնայի» շվեդ հարձակվող Զլատան Իբրահիմովիչը, որը հաղթանակ պարգևեց հավերժական հակառակորդ «Ռեալի» նկատմամբ, նշել է, որ այս պահը շատ կարևոր է իր համար:
Շվեդը կարողացավ «Ռեալի» դարպասը գրավել խաղադաշտ դուրս գալուց ընդամենը չորս րոպե անց՝ Դանիել Ալվեշի երկար փոխանցումից հետո գնդակն ուղարկելով մրցակցի դարպասը:
«Դանին ինձ հիանալի փոխանցում կատարեց, ես պարզապես ձգտեցի դիպչել գնդակին, և այն հայտնվեց դարպասում: Սա ինձ համար երջանիկ պահ էր, քանի որ սա իմ առաջին «կլասիկոն» էր:
«Բարսայի» գլխավոր մարզիչ Խոսեպ Գվարդիոլան նույնպես առանձնացրել է շվեդ ֆուտբոլիստի դերը սկզբունքային խաղում:
«Նա շրջեց խաղը»,- ասել է մասնագետը:
Գնահատելով ընդհանուր խաղը Գվարդիոլան ասեսլ է, որ սա լավ ստուգատես էր. «Մադրիդի դեմ միշտ էլ դժվար է խաղալ, հատկապես, երբ խաղադաշտ ես դուրս գալիս ֆավորիտի կարգավիճակով: Այդ պահին Մադրիդն առավել վտանգավոր է»,- ասել է «Բարսայի» մարզիչը:
Իր հերթին «Ռեալի» գլխավոր մարզիչ Մանուել Պելլեգրինին ասել է, որ իր թիմն այս խաղում առնվազն ոչ-ոքիի արժանի էր. «Շատ հավասար խաղ էր և մենք ունեինք մեր հնարավորությունները: Մենք պարզապես չկարողացանք օգտագործել մեր առավելությունը: Ես կարծում եմ, որ մենք արժանի էինք գոնե ոչ-ոքիի»,- հայտարարել է Պելլեգրինին: